政情：遺失手機 梁美芬無知無覺
手機係港人生活必不可少嘅物品之一，仲收埋好多私隱添o架！立法會議員梁美芬早前漏咗部手機喺美容院，但係自己竟然完全唔知道。
設密碼上鎖 唔怕洩私隱
據知有傳媒打電話畀佢嗰陣，發現接聽嘅係另一把女聲，並非梁美芬本人，對方自稱係美容院職員，梁美芬係佢哋嘅顧客，遺漏電話喺美容院，傳媒聯絡其助理通知，而梁美芬其後就相約美容院職員，先攞番部電話。
唔見電話咁大件事，怕唔怕洩露私隱呀？梁美芬就話唔怕，自己有設密碼鎖起電話，唔會洩露其他人嘅電話號碼，而呢個電話號碼都冇乜秘密，更加唔會有貼面親熱照，只有街坊求助，或者記者聯絡佢做訪問，仲笑指等執到電話嘅人，就算睇到佢收到嘅短訊，都係知道吓佢有幾努力做地區工作，咁都幾好喎。其實一部電話都唔平o架，加上依家都有唔少破解電話密碼嘅方法，梁美芬以後真係要小心啲喇！