政情：行會免換班 建制坐定定

立會震源非建制派

行政會議政商頂層匯聚，成員處於行政決策核心，有機會掌握政府機密資料同影響政策制訂，建制派內對入閣趨之若鶩嘅人為數不少，躋身其中往往係身份象徵。依家獲委為行會成員嘅政黨代表就有民建聯葉國謙、工聯會鄭耀棠、新民黨主席葉劉淑儀、新界鄉議局副主席張學明同經民聯副主席林健鋒。至於自由黨，由於代表周梁淑怡喺二○○八年立法會選舉中連任失敗，故辭去行會席位，及後該黨與特首梁振英關係惡化，至今仍無代表喺行會內。

新一屆立法會雖然人事「大地震」，多名資深議員落敗，但「震源」主要集中喺非建制派。反觀建制派內嘅行會代表，包括葉劉淑儀同林健鋒均成功連任。民建聯方面，黨主席李慧琼喺今年主動向行會請辭，而接力入行會嘅葉國謙亦宣布唔再競逐連任選，而該黨派出十二隊均全數獲勝成為建制第一大黨，影響力依舊。至於鄭耀棠代表嘅工聯會只係較上屆少一席，鄉事派亦係各建制派喺新界嘅鐵票票倉，因此張學明嘅席位亦穩陣。

有行會中人透露，由於議事堂內建制同非建制嘅政治格局基本不變，非建制派仍保有三分一議席否決權，喺未有重要人事變動下，行會難有換人誘因。此外，現屆政府任期將喺下年六月底屆滿，消息人士指特首選舉戰半年後就開打，到時誰坐上特首寶座仍屬未知之數，政府傾向「一動不如一靜」，維持行會現況至任期完結，直到下任特首出爐，才重組行會班底都未遲。