中環出更：游蕙禎 鄺葆賢再合體整餅益街坊
九龍城區議員鄺葆賢同青年新政嘅候任立法會議員游蕙禎，呢對「黃埔孖寶」形象深入民心，可惜鄺葆賢早前退出青年新政，令到「黃埔孖寶」拆夥。除要兼顧公立醫院急症室醫生同區議會嘅工作外，鄺葆賢最近又話會重返校園讀法律，時間唔夠用，佢早前都話未知幾時會見到游蕙禎，點知尋日佢哋竟然「合體」喎！搞邊科？
鄺葆賢尋日上載咗一張同游蕙禎嘅合照，相中兩個人捧住一盤啱啱新鮮出爐嘅奶黃月餅，原來「黃埔孖寶」再次「合體」，係要整餅益街坊，當係慶祝就嚟到嘅中秋節喇！
拍片放上網 教整月餅
游蕙禎接受查詢時就話，自己同鄺葆賢關係一直好好，今次係鄺葆賢自掏腰包整月餅慰勞義工，佢哋同時會將整月餅嘅方法拍片上網，希望街坊可以學識自製月餅，對抗內地嘅黑心食物。佢又話唔同嘅節日都會預備唔同方式同街坊慶祝，未來唔排除同鄺葆賢再有合作，但佢就大嘆資源唔夠，好多時搞地區活動都要靠贊助，希望政府可以畀多啲資源區議員就好嘞！
卓妮