中環出更：李文斌教仔嚴三歲先准睇電視
早前有調查指幼童太早使用智能電話等電子產品，患上過度活躍症風險會較高，卓妮尋日於沙田馬場見到一班城中名人，唔知佢哋面對小朋友「扭計」要用電話等智能產品嗰陣，佢哋又會唔會即刻拎出「電子奶嘴」畀佢哋用呢？理文造紙執行董事李文斌（Edmond）同太太何芷韻（Amanda）就話唔會喇，仲講到明三歲之前唔畀睇電視添！
Amanda話聽到唔少調查同研究指小朋友太早使用電子產品會有乜嘢壞處，先唔講過度活躍，就算係對眼睛嚟講一樣唔好，所以平日佢哋有個家規，就係未到三歲唔可以用電子產品，連睇電視都唔得。但咁噃，小朋友見到大人用就會「扭計」o架啦，加上佢有三個小朋友，兩個夠年齡睇，一個未夠咁又點算呢？咁呢樣就靠教育喇，佢話只要同仔女講道理，向佢哋解釋好處同壞處，或者陪佢哋一齊唔睇，一係就睇書代替，培養埋佢哋閱讀習慣。
林建康：中一至畀阿仔用手機
轉頭見到愛沙尼亞共和國駐港名譽領事林建康同太太林黃寧艷，佢哋都認為小朋友太早使用電子產品唔係咁好，林建康仲笑言自己用得多都覺得散光深咗，但依家呢個年代，身邊人包括同學仔個個都用，實在好難避免，而佢哋就選擇中一先畀阿仔用手機，依家阿仔對啲App同功能仲熟過佢。而早前暑假佢哋就一家去咗約五、六星期旅行，去多啲唔同地方，用電子產品嘅時間都少啲，仲更加有益身心！
至於考評局主席陳仲尼同太太區海倫就透露，佢哋喺開學前同小朋友去咗紐約，話除咗行街食飯之外，仲可以睇好多場百老匯演出，覺得喺嗰度睇嘅感覺特別有氣氛喎。
卓妮