香港近年撞邪！冇嘢令人稱心，除「宜居排名」急瀉，又有調查指港人對經濟前景悲觀，消費者信心是亞太區之中最低，就業前景指標明顯下滑，逼近○三年沙士時低位。
港人灰爆，冇神經政府只識扮鴕鳥，民生無小事？好心喇，就算搽足面懵膏，都唔好擘大眼講咁多大話，一時話樓價租金在雙辣招下受控，一時話全民近乎就業、扶貧加快力度……而實情係樓價租金升極都有。差餉物業估價署最新數據指，七月份樓價指數按月再升百分之一點八八，連升四個月；至於租金就好似港鐵「可加可減」機制，一味有加冇減，老朽飄泊人生，成世租屋住最清楚，由中半山租到九龍，市區租金愈加愈勁，最後隱居上水村屋，依然年年有加冇減。
對香港嘅經濟前景悲觀，唔使調查都知結果喇！去年大學畢業生起薪點中位數唔夠萬四蚊，同廿年前嘅萬六蚊比較，減少近百分之十五，試問廿年來，物價高漲，樓價又升到阿媽都唔認得，年輕人上樓無望，向上流滴水不見，你話人生有可能唔灰爆嗎？
冇神經政府坐擁金山，誓死逆民意，唔肯落實全民退保，寧願百億千億咁花喺大白象工程上；安老冇方，扶貧冇力，貧窮人口不減反加，據悉全港有廿一萬「雙貧人口」，即係收入低於貧窮線，開支也低於全港住戶開支中位數百分之五十，當中長者約兩成，即約四萬一千人。最近內地「葛優躺」一詞爆紅，出自廿多年前的喜劇《我愛我家》：葛優飾演的小人物像大爺斜靠在梳化上，眼神空洞望遠方，外表邋遢，肌肉鬆弛，神情頹廢，一副生無可戀的死相，最為應景的背景音樂，則是近來竄紅的《感覺身體被掏空》——「感覺身體被掏空，我累得像隻狗。」這幾年，香港經濟空轉，民生凋敝，不要說基層痛苦，即使中產（財爺除外），在沒有標準工時下，為生計還不是累得像隻狗！