中環出更：吳克儉論港獨 教界斥施壓
新學年開學後，港獨議題殺入校園，學校應否討論及如何處理港獨問題引起爭議。香港教育大學教育政策與領導學系兼任講師梁恩榮尋日在電台節目中話，應讓港獨議題回歸教育專業，相信教育專業絕對有能力處理，並不需要官員指指點點，矛頭指向教育局局長吳克儉。
破壞校方同學間互信
梁恩榮話，近期有官員不停以似是而非嘅論述向學校施壓，要求禁止同學討論港獨。他認為校方若因受壓，被迫強硬執行呢啲不合理措施，一方面會引來同學更強嘅反彈，亦會將討論轉去地下，後果只會是破壞學校與同學間嘅互信，對教育專業帶來負面影響。佢更擔心先例一開，學界會否引入「香港二不講」，「三不講」甚至「N不講」。
佢話，香港現行法例冇「分裂國家」罪，若根據《刑事罪行條例》第200章第9和10條，純粹討論、發表意見或評論，並不構成煽動叛亂。面對困難重重嘅前景，港人必定會遇上更多爭議性嘅政治議題，梁恩榮認為學校責無旁貸，應以教育專業的原則，來裝備年輕人，迎向挑戰。
卓妮