中環出更：星洲爆寨卡 安「心」未驚過
新馬季尋日喺沙田馬場開鑼，抖暑近兩個月嘅名人馬主們都同親友入場攞個頭彩。講起寨卡病毒疫情喺新加坡迅速擴散，永隆銀行後人伍步功及裕華國貨董事總經理余鵬春（PC）都話好驚，伍步功決定取消去星洲行程，PC就擔心裕華喺星洲四間分店嘅員工安全，其中包括佢個寶貝女及姪仔。不過，遊遍世界嘅康泰旅行社創辦人黃士心（Jackie）就未驚過，本月下旬按原定計劃去星洲視察生意。
PC講起星洲寨卡疫情即眉頭深鎖，但唔係擔心疫情蔓延到香港影響生意，而係旗下員工已身陷疫區。佢話，啱啱同個女講電話叫佢小心，要噴吓蚊怕水及服用有助防疫嘅藥材。係喎，乜嘢藥材可以防疫呢？PC就苦笑話唔知，佢只係提醒吓個女可與同事研究吓喎，真係搞笑！
伍步功釣魚也避疫
鍾意海釣嘅伍步功就話，原本十幾號要去新加坡釣魚，跟住去馬來西亞打波，但係依家就唔敢去喇，月尾去北海道釣魚一樣咁開心。同場仲有理文造紙創辦人李運強，卓妮就問佢怕唔怕寨卡病毒啦，佢形容「聞之喪膽」喎，其實講吓笑啫！
Jackie就話，遲啲去星洲嘅計劃不變，因為佢喺當地有旅行社、酒樓及物業投資，夥計都有三百幾人。佢又話，個仔香港旅遊業議會主席黃進達忙於公務唔得閒理，所以雖然佢退咗休，但都過去睇吓當支持個仔喇！病毒當前，Jackie都話冇嘢驚，因為佢曾任西非馬里共和國駐港名譽領事廿幾年，又去過無數落後國家，仲使乜驚呀？
卓妮