「學生哥，好溫書咯，咪淨係掛住拍拖。」計功夫茶話齋，家陣嘅學生哥淨係掛住拍拖都算正常嘞，掛住搞港獨先至最大鑊。呢，尋日開學日，多間中學都有學生喺學校門外派發傳單宣揚港獨，擺明當港府冇到，你話係咪弊弊都冇咁弊吖？
一開學就嚟料，證明港獨氾濫成災，點止入侵校園咁簡單，遲吓港獨政黨入埋立法會，肯定天下大亂都似。為咗對付港獨入侵校園，呢排「唔得掂」局長頻頻撲撲，一時跑到北京求計，一時強調校園冇討論港獨嘅空間，一時又話將有關問題交畀學校自己搞掂。其實，做咁多嘢都係捉錯用神嘅咋，唔通仲未睇到宣淫播獨不遺餘力嘅壹傳媒繼續喺度荼毒人心咩？
講真，香港近年亂象不斷，邊一單背後冇壹傳媒嘅黑手吖。嗱，人稱「漢奸黎」嘅壹傳媒老闆黎智英眼見出錢出力搞佔領都搞唔出咩花樣，轉向港獨埋手，最近頻頻發功，旗下刊物連篇累牘鼓吹港獨不特止，仲日日吹捧一班港獨分子，當正佢哋英雄咁拜，你話啲學生哥長期耳濡目染，有乜辦法唔「中毒」呀？本報記者注意到，佢老哥最近又召見外號「李漢奸」嘅李柱銘、「AV仁」何俊仁等反對派政客去佢屋企密密斟，一斟就三小時咁耐。傾啲乜外界唔知，但睇佢哋鬼鬼祟祟成咁，一定冇好嘢，香港又要多事喇。
呢，家陣立法會選戰打到如火如荼，七國咁亂，唯恐天下不亂嘅漢奸黎點會唔周身痕，出來攪亂檔吖。市民眼睛係雪亮嘅，連日有大批市民自發到漢奸黎寓所門外抗議，仲有團體遊行去遮打花園「反黑金」，除咗鬧爆佢係「賣港奸賊」，仲踢爆佢係「港獨總舵主」添，證明公道自在人心。有人計過，呢排去漢奸黎寓所及壹傳媒大樓外示威嘅行動已經最少六十次，幾乎日日都有，仲旺過旅遊景點，如果市民唔係忍無可忍，點會山長水遠去聲討佢吖。
冇計喇，如果港府有法必依，執法必嚴，使乜民間義士出頭喎。第樣唔講，淨係講漢奸黎幕後策劃佔中，又捲入黑金醜聞，當局查來查去都係得個吉，簡直離晒大譜。港府投鼠忌器，姑息養奸，漢奸黎同埋佢個賣港集團先至可以咁囂張，既然犯法唔使付出成本，其他牛鬼蛇神仲唔有樣學樣咩。港獨勢力之所以一發不可收拾，咪就係脫胎自佔領之亂同埋港府縱容囉。
講到尾，打蛇打七寸，擒賊先擒王。港府成日煞有介事話要「打獨」，一時禁止校園討論，一時又話報警究治，其實唔從病源入手，將「港獨總舵主」打到永不超生，講乜都係嘥氣。