政情：鍾庭耀縮沙 拒報即日票站分析
民調風波仍然沒完沒了，繼早前有多個政黨質疑港大民意研究計劃嘅專業性、有傳媒表明唔公布立法會選舉滾動民調嘅結果之後，港大民研更決定「縮沙」。總監鍾庭耀尋日話今年佢哋唔會喺嚟緊嘅周日，即日公布同埋分析票站調查數據，只會安排五十個學生到各區票站外以問卷形式收集數據，喺事後先會作分析。
民調曾遭多番質疑
鍾庭耀尋日喺電台節目上解釋，指政府冇處理過有關票站調查數據被政黨用作選舉工程甚至配票，再加埋傳媒未必會去考究報道上票站調查數據嘅準確性，搞到調查專業性下降。早前佢已經「跪低」，讀番名單排第二嘅候選人，依家直頭唔做即日分析，未知呢次「縮沙」會唔會可以挽回番港大民研嘅公信力。
至於有傳媒不滿另外一個有份贊助嘅團體利用民調作選舉工程，索性唔公布民調結果，鍾庭耀就認為喺社會分化下，有人對部分團體套上「莫須有」罪名，但又強調唔會影響滾動民調嘅公開性。既然講到話唔會影響，又做乜要「縮沙」唔公布民調分析呢？