政情：雙料會長 胡劍江為後進創商機
各個商會都講求年輕化，香港潮州商會都唔例外。胡良利珠寶第五代後人胡劍江（Michael）接替張成雄出任商會新一屆會長，咁啱上星期佢獲全世界有三十幾個屬會嘅國際潮青聯合會推選為執行會長，可謂「雙喜臨門」，佢話會致力為年輕人創造商機。
潮商一眾重量級人物包括永遠榮譽會長廖烈武、陳有慶同周厚澄等人，早幾日親自見證交接儀式。Michael成為「雙料」會長，梗有滿腹大計。佢話今次當選國際潮青執行會長，係各地潮屬社團對香港潮商的肯定，所以佢更加要加強潮商同世界各地潮屬精英的合作交流，支持潮商青委的工作，為年輕人創造商機。
計劃藉社交網推廣商會
今年五十一歲嘅Michael係潮商近年少見較年輕嘅掌舵人，佢爸爸當年亦係潮商會董會成員，所以對潮商感情深厚。佢話正構思利用時下流行的社交網絡平台，致力推廣商會及年輕化，但詳情就要賣下關子喇！