政情：唐智強升官 同兩電拗手瓜
官場音樂椅即將轉動！外界盛傳首長級第八級（D8）嘅環境局常任秘書長兼環境保護署署長王倩儀（Anissa），將於未來一至兩周內退休，而空缺就由勞工處處長唐智強（Donald）升官接班，環境局現正處理與中電同港燈兩間電力公司就利潤管制協議嘅談判，Donald有處理勞資糾紛經驗，夠唔夠牙力將准許回報率再壓低啲，令市民可以減電費呢？
有勞資糾紛拆彈經驗
Anissa算係政務官一個奇葩，皆因佢同民政事務總署前署長陳甘美華一樣，一做就做咗十幾年，就此做到退休，而接任嘅Donald，曾任前環境運輸及工務局副秘書長（環境），對新職嘅範疇都有經驗，而佢出任勞工處處長兩年多任期內，都處理過亞視欠薪，以及處理印傭Erwiana被僱主虐待，政府如何檢討保護外傭政策，都算係有拆彈經驗。
政府停留嗌口號階段
兩電准許回報率百分之九點九嘅緊箍咒喺二○一八年屆滿，政府亦已展開接觸談判，環境局之前仲打晒開口牌，話想將回報率降至百分之六至八嘅目標，而Donald接手之後相信都要披甲上陣，尤其兩電已開始布局，但政府官員仍停留喺嗌口號嘅階段，究竟Donald有乜板斧，令政府團隊可以喺專業要求抗衡到兩電嘅專家團隊呢？大家要拭目以待嘞！
至於Donald留低嘅D6位，據聞由特首私人秘書陳嘉信（Carlson）升任，Carlson早喺一二年三月梁振英當選特首，就被安排擔任候任特首私人秘書，及後過渡至同一職位，至今近四年半。
據知Carlson嘅接班人亦已確定，係向財經事務及庫務局「挖角」，將該局副秘、屬D4位嘅梁悅賢（Esther）平調入特首辦。Esther任職副秘長達四年多，經歷剛過去嘅一屆立法會財委會拉布「盛況」，亦要每年負責向傳媒解構《財政預算案》，曾處理長遠財政計劃工作小組，官場評價都幾正面。