中環出更：壽宴談養生 賓客愛運動
生命在於運動，運動亦係健康長壽嘅不二法門。早前近千名城中名人齊聚灣仔會展嘅名人壽宴，甫落幕嘅巴西里約奧運仍然係茶餘熱話，但寨卡病毒未受控，啱啱落機即趕赴壽宴嘅港協暨奧委會會長霍震霆怕唔怕中招呢？佢輕鬆笑稱：「嘿！蚊都未見過一隻！」
當晚係仁濟醫院前主席林煒珊（Vanessa）爸爸八十歲生日，Vanessa忙到滿場飛。同壽星公相識幾十年嘅香港足球總會前主席余錦基夫婦亦有到場，余錦基話無去巴西睇奧運，因為早前去咗睇歐洲國家盃足球賽，已經滿足晒。
胡郭秀萍遊日釣魚大豐收
享受運動嘅仲有胡應湘同太太胡郭秀萍，佢哋啱啱去完北海道玩，胡太話最開心係出海釣到二十幾條大魚，除咗即時炮製魚生同炸魚嚟食之外，仲帶咗兩條返港添！胡太講到眉飛色舞，事關佢次次釣魚都空手而回，難怪咁興奮。話時話，戶外運動令人咁開心，難怪係養生之道。
當晚到賀嘅嘉賓多到爆，包括仁濟醫院董事局成員同歷屆主席、總理們，仲有博愛醫院永遠顧問王敏馨同細佬王敏剛，太子珠寶鐘錶主席鄧鉅明同太太鄧宣宏雁都嚟賀壽。在場見到「M超跑會」創辦人馬仁威夫婦，原來佢爺爺馬子修當年做棉紗生意，同做紡織製衣嘅林家係世交，佢自細就識Vanessa，梗係要為世伯賀壽喇！
卓妮