話說油麻地戲院未變身為粵劇演出場地前，喺門口掛出大大隻字嘅標語︰「資訊科技年代，鹹蟲依然存在」，可惜最後仍然被時代巨輪淘汰，呢個故事教訓大家，科技發展日新月異，唔識與時俱進，遲早死路一條。
講到同時代脫節，除咗成人戲院，仲有香港嘅電腦教育。早排國際組織公布全球創新科技指數，結果香港連跌三位，被新加坡進一步拋離之餘，更被南韓爬頭，主要原因正正係教育政策失敗。本報調查後亦發現，教育局之前實施嘅初中電腦課程指引out到冇朋友，好似電腦堂教嘅編寫語言Logo（圖龜）咁吖，有學生家長話細個都係學呢啲，就知有幾落伍。
教嘅嘢唔等使，反而學生有興趣嘅就唔教，簡直吹脹。係人都知，家陣編程（Coding）以及手機App（應用程式）課程大行其道，偏偏課堂冇呢類內容。有業界人士係咁講嘅，大學電腦系收生好少參考中學電腦科成績，就係因為課程內容完全跟唔上時代需要。
中學電腦教育衰乜？有教育界人士認為，其中一個原因係港府唔肯投放資源，學校科技教育經費一年只得十萬元咁大把，仲要逐年檢討，今年唔知出年事。講真，港府科研投入嚴重不足，都唔知畀人炳過幾多鑊，莫講話中學，全港大學科研經費加埋都唔夠內地一間普通大學，一味手緊，點出人才？
不過冇計喇，只要睇吓邊啲庸官主理教育同創新科技，就知香港注定冇運行。教育局局長吳克儉有名你叫「唔得掂」，淨係遏止港獨思潮入侵校園已經搞到自顧不暇，仲得閒理電腦教育咩；至於創科局局長楊偉雄，上任以嚟做過咩實事大家唔知，佢老哥最鍾意「集郵」，四圍吹噓識得邊個科技界猛人就係人都知。睇吓新加坡總理李顯龍，同臉書創辦人朱克伯格談笑風生，仲被對方盛讚「少數識編寫程式嘅國家領袖」，高下立見。
講起就唏噓，曾幾何時香港創新科技相當架勢，連騰訊老闆馬化騰都話，自己係上世紀九十年代喺香港初次接觸互聯網，嗰時香港引領大中華風氣之先，幾咁威風。廿幾年過去，內地資訊科技後來居上，反觀香港原地踏步，一間似樣嘅科技公司都冇，幾咁羞家。又好似八達通咁，曾經係各地爭相倣效嘅對象，依家內地網上支付系統發展一日千里，跑贏香港九條街。
所以話，港產官僚發展創新科技葉公好龍，講多過做，再多老本都唔夠食。計功夫茶話齋，要搞好電腦教育，培育科技人才，與其換電腦課程，不如換人腦，換廢官！