政情：公民講場：自由球員喻港Greg蘇抽錯水

港府高官呢排有鋪抽運動員水嘅癮，繼發展局局長陳茂波抽水，藉「牛下女車神」李慧詩出戰奧運一事，推銷當局計劃推展貫穿新界嘅單車徑，最新輪到商務及經濟發展局局長蘇錦樑（Greg蘇），佢尋日出席一個午餐會時主動提及於里約奧運奪金嘅中國女排，就話香港喺「一帶一路」嘅角色，可以聯想為排球隊中嘅「自由球員」，並形容「自由球員」嘅靈活變通反應快，同樣係香港人嘅特質。不過，有心水清嘅人話，「自由球員」其實有好多限制，包括唔可以發球、攔網、扣球等，令人懷疑Greg蘇係咪變相暗示香港要喺「一帶一路」有所發揮，亦可能面對好多限制，真係抽錯水嘞！