政情：夏千福退休後首現身香港
新任美國駐港澳總領事唐偉康日前已抵港履新，仲學晒佢上手夏千福啲嘢，透過領事館facebook上載影片及自拍照介紹自己。至於已於外交生涯退休嘅夏千福，尋日下午再次現身香港，喺中環一帶好似無所事事咁行嚟行去。
一支公中環國金「行行企企」
夏千福喺臨卸任前講過，已獲一間私人企業聘用，稍後會重返香港。唔知佢尋日喺早咗放工、定係喺返新工期間偷雞落街，行個圈休息吓呢？
尋日下午接近五時，我哋見到穿着一身整齊西裝嘅夏千福，一支公現身中環國金。佢首先行去商場詢問處問嘢，然後去咗戲院門口，似乎想望吓有乜新戲上映。其後佢又入咗一間賣文具同皮革嘅舖頭，不過都係搞搞震、冇幫襯嗰隻。
大約五時十五分，夏千福行到去交易廣場平台，坐咗喺度，原來係綁鞋帶。之後佢攞出手機，玩咗一陣，大約逗留咗廿分鐘，先至起身去交易廣場一期，唔知係上去見人定返自己公司。夏千福本身係一位中國通，亦曾擔任北韓問題六方會談特使，甚至派駐過去前蘇聯同伊拉克，佢退休後轉咗打咩工？到底係咩私人企業請佢？真係好想知囉！