政情：陳家亮切息肉「斷片」初體驗
一向大力推廣大腸癌篩查計劃嘅腸胃肝臟科權威、中大醫學院院長陳家亮平日幫人檢查就多，早前輪到自己「以身試鏡」接受大腸內窺鏡檢查，最後發現有粒小息肉要做手術切除，佢又自爆躺在手術床上一刻，其下身感到「涼浸浸」。
檢查冇戒口 錯誤示範
陳家亮於最新一篇周記中透露，經過大半年安排，上個月終於接受咗大腸入窺鏡檢查，佢坦言要轉換角色唔容易，有同事更帶笑提醒佢要守規矩，事關檢查前三日要開始避免高纖維食物，前一日只可吃粥，否則會影響檢查質素，惟他自言於呢方面完全失敗，檢查前一晚完全冇戒口仲出席晚宴，要到同日晚上十時才開始非一般洗腸程序，選擇濃縮瀉藥，加上拚命灌水，因此「當晚廁所變成咗睡房」。
陳家亮於當日另一深刻感受就係知道何謂「斷片」，形容同睡覺醒來完全唔一樣，因為一來唔知幾時失去知覺，二來張開雙眼想問幾時開始手術時，原來已經做完，因此感慨風水輪流轉，總有一日醫生都會變成病人。