政情：何厚祥「含淚」擱置增選委員？

十八區區議會均有權決定係咪委任一批增選委員，加入區議會轄下嘅委員會，而每區區情不一，所以各方取態亦未必係鐵板一塊。除咗部分區議會意見較大外，大部分區議會內建制、泛民區議員均可於委任增選委員嘅議題上取得共識。不過話雖如此，今年情況卻有微妙變化。

兩陣營原只差一人

眾所周知，建制及泛民於沙田區議會係二十對十九，建制僅以一票之差取得主導權，只要有任何甩轆或走票就形勢逆轉。據聞沙田區議會於正式會議討論係咪委任增選委員前已有倒戈情況，而喺五月底正式上會討論時，首先提出建議擱置討論委任增選委員議題，竟然係建制派區議員，而泛民多名區議員亦隨即和應，批評增選委員非民意代表，最終在泛民及部分建制派區議員過半數贊成下，通過擱置有關議題嘅討論。換言之，最少一段時間都唔可以重上議事日程討論。

事件引申檢討制度

然而最耐人尋味嘅係投票結果，事關部分被指倒戈嘅建制派區議員當中，竟然包括何厚祥，究竟何厚祥係基於形勢比人強，無奈自行撐擱置討論委任增選委員，還是一早已下定決心喺制度上革新議會，只有佢自己至知嘞！有地區人士分析，獲委任嘅增選委員只係負責區議會轄下個別委員會，向來只係隔兩、三個月先開會一次，如果冇咗佢哋加入有關委員會，就只餘下一批區議員，如有較多區議員缺席會議，會增加流會嘅風險。

有政界人士就話，今次事件引申另一問題，就係委任增選委員制度何去何從，事關連同沙田區議會在內，暫時有三個區議會未有委任增選委員，佔整體六分之一，當局會唔會趁機作出檢討，就考驗其政治智慧嘞！