中環出更：中總換屆在即新會長呼之欲出
城中四大商會之一嘅中華總商會（中總），其領導層換屆選舉進入倒數時刻，外界盛傳曾任中總會長嘅新華集團主席蔡冠深，有意翻兜再任會長，之不過蔡冠深有否對此正式表態，一直係一個謎團，呢個謎底喺日前正式揭盅，中總會長楊釗出席一個酒會時，面帶笑容證實蔡冠深確實係一個人選，而且仲有「一個半個都有興趣」，但佢唔肯透露呢「一個半個」係何方神聖！
中總領導層換屆於今年底前上演，楊釗話，中總已為此成立選舉委員會，由永遠榮譽會長霍震寰做主任，副主任就由自己同永遠榮譽會長林廣兆出任。佢透露，今次換屆會有多名副會長退任，加埋會長合共要填補三、四個人，就此，選委會早前已開過會，有興趣角逐嘅人已有打招呼，一切「醞釀中、平衡緊」。佢強調，按中總傳統最好透過協商解決，唔好搞到太大陣仗。有消息稱，如果蔡冠深堅持想出任會長，基本上很大機會成為接班人！
盧文端心痛囡囡日做12小時
同場仲有中總副會長袁武及盧文端、新界社團聯會榮譽會長羅叔清等人，其中盧文端啱啱去北京探喺酒店實習嘅細女。佢一輪嘴呻話，細女日日開工十二個鐘，好辛苦，難得放假去故宮參觀，仲要大排長龍買飛。見佢係咁呻，唔通囡囡同佢訴苦？原來唔係，係做老竇嘅唔捨得啫！
此外，最近中國奧運金牌運動員訪港引起市民關注，「美容教母」鄭明明都有留意，佢笑言巴西里約奧運比賽期間都有追睇。佢好欣賞運動員不言敗嘅精神，同佢奉行嘅「不倒翁」精神不謀而合，早前佢仲趁集團五十周年慶訂造好多不倒翁娃娃送畀有緣人添！
卓妮