中環出更：馬斐森：港獨不切實際不符利益

港獨議題愈演愈烈，香港大學校長馬斐森尋日喺新生入學禮之後發表有關港獨嘅立場書，佢提到港大擁護一國兩制，而大學中央管理小組認為，港獨唔係一個現實嘅選項，唔符合港大嘅最佳利益，但佢認為言論自由係大學基石，可容許學生討論具爭議嘅議題。馬斐森喺港大開學之初就企硬反對港獨入侵校園，都算係威番次喇！

雖然馬斐森指學生可以討論敏感和具爭議的議題，但佢話自由伴隨責任，強調校方唔容許仇恨、冒犯和暴力行為，希望大學成員尊重法律。佢又話，港大成立之初，是一所為中國而設英語大學，致力與內地大學及院校保持緊密聯繫，唔希望港大履行「亞洲環球大學」使命嘅過程中分心。

對於近日嘅港獨爭議，學生會會長孫曉嵐認為，「香港不是中國」，任何有關香港前途嘅討論應得到鼓勵，而非禁止，在校園內討論港獨，亦永遠不應成為禁忌。港大新生周同學就話，需要捍衞港大及香港社會嘅核心價值，但應該用理性而非暴力嘅手段去爭取，佢話會從各大報章中了解港獨等政治議題，但唔會參與任何有關港獨嘅集會。

卓妮