以前成日話「廉署保密，密密實實」，呢鋪講法要戒嘞，事關家陣廉記內部亂過亂世佳人，仲要家醜揚到通街都知，「廉署洩密，四面透風」就差唔多。
廉記呢輪唔知係咪撞咗邪，高層人事調動十足十玩音樂椅，你方唱罷我登場，而最蹺蹊嘅係，每次爆親大鑊，有政黨例必「春江水寒鴨先知」，搶先引述廉記內部「消息人士」發放嘅訊息，話中間冇景轟，三歲細路都唔信。咁就難怪有團體日前踩上廉署總部抗議，要求調查內部係咪有「關鍵鏈」，徹底揪出內鬼喇。
咁又係呀，廉記洩密自身難保，叫市民以後點放心舉報貪污？仲有吖，ICAC裏面嘅I係Independent，話明「獨立」，梗係要不偏不倚不朋不黨，家陣居然同政黨眉來眼去，勾勾搭搭，仲有咩公信力可言！
講開又講，廉記形象大插水，洩密只係冰山一角咋。好似人稱「漢奸黎」嘅壹傳媒老闆黎智英咁，被踢爆向反對派政客秘密捐款逾四千萬元，眨吓眼過咗兩年有多，廉記查來查去仲係得個吉，被質疑偏私包庇有乜出奇吖。話口未完，尋日又有團體到廉署總部示威，要求盡快徹查漢奸黎嘅黑金案件。不過你有你鬧爆，人哋背後有外部勢力撐腰，當局投鼠忌器咯喎，毛都唔敢郁佢一條喇。
古人就講得啱嘞，百年養不足，一日毀有餘，想當年廉記成立，由打擊警隊貪污開始，經過幾十年努力，終於建立香港廉潔之都嘅招牌，「香港，勝在有ICAC」實至名歸。可惜花無百日紅，近年廉記內部風雨不斷，先係出咗個貪威識食、「茅台換政協」嘅前專員貪湯，到被指包庇黑金，再到疑似籠裏雞作反嘅洩密疑雲，市民對廉記信心蕩然，香港廉潔排名跌跌不休，依家知點解喇。
諗落都幾悲哀，香港一直以來賴以成功嘅基石，「廉潔」搖搖欲墜，「法治」危在旦夕，特別係佔領之亂後，「警察捉人，司法放人」亂象路人皆見。最新例子係年前衝擊政總公民廣場、觸發七十九日佔領之亂嘅學生領袖，居然被法庭放生，搞到法律界人士都睇唔過眼，去信律政司司長要求檢視覆核。廉記烏煙瘴氣，正義女神天秤側埋一邊，再加埋被指同黑幫勾結嘅警隊，香港有乜法子唔七國咁亂吖。
這是最好的時代，也是最壞的時代。香港禮崩樂壞，綱紀蕩然，講到底都係上樑不正下樑歪。過去係「香港幾好都有，點捨得走」；家陣就係紛紛擾擾，家嘈屋閉，冇日安寧，有門路嘅紛紛移民，走唔到嘅坐困愁城，都咪話唔心噏。