政情：黃楚恒舉家外遊要盡興
香港學生一向以多功課見稱，早排就有報道指有家長叫小朋友帶埋暑期功課去旅行，一邊搭飛機一邊做功課，早幾日我哋喺一個活動中見到中總青委主席黃楚恒（Stanley），有五個小朋友嘅佢早前同家人去日本沖繩旅行，仲話一定唔會要小朋友帶埋功課去添！
唔會叫小朋友帶功課
Stanley話成個暑假有個半月咁長，去旅行最多咪去幾日，而外遊無非都係想一家人輕輕鬆鬆開心吓，帶埋功課去好掃興啫，所以佢一定唔會叫小朋友咁做。
除咗最細嘅小朋友留喺香港，Stanley同太太帶埋四個仔女去沖繩，梗係唔少得玩水啦！佢話幾個小朋友都係自幼就識踏兩輪單車同游水，要訓練佢哋自立同不能嬌生慣養，佢哋仲去咗餵海龜同摸海豚，希望可以啟發到小朋友嘅探索能力同愛心。