香港成日自詡國際都會，其實好多方面嘅觀念仲係幾落後，好似綠色消費咁吖，人哋歐美先進地區已經講咗N咁多年，香港人似乎有必要急起直追嘞！
話說有位從事環保外賣盒生產嘅仁兄，之前十年主攻歐美市場，一直表現唔錯，近半年返港大展拳腳，至今有五十多個餐廳以及小店客戶，但即使最大客戶嘅高級西餅店，每月亦只係訂幾十箱貨，同外國客戶簡直係蚊髀同牛髀，佢承認本地市場好難維持收支平衡，之所以堅持回流，都係想為本地環保業出一分力咁話。
即係咁，呢款環保外賣盒以蔗渣及竹製作，九個月就可完全分解，而普通發泡膠就要一萬年，價錢冇錯係貴啲，但一分錢一分貨，環保外賣盒唔單止質地較厚，冇咁容易辣親手，遇熱亦唔會釋出有害物質，顧客食都食得安心啲。
好嘞，既然環保外賣盒好處咁多，點解香港始終未能普及，唔通真係外國月亮特別圓，鬼佬商家講心唔講金？梗唔係啦，蝕本生意無人做，只要消費者環保意識夠高，商人自然要迎合，即使成本高啲都冇計。呢幾年陸續有美國知名玩具生產商宣布放棄採用砍伐熱帶雨林嘅紙張，你估佢哋嫌錢腥咩，講到尾咪向消費者以及環保團體壓力就範。
不過講就咁講，唔少香港消費者一味貪平，觀念跟唔上，環保官僚更加係得過且過，胡混度日，講乜都嘥氣。大家可能唔知，原來發泡膠係可以回收嘅，好似日本東京築地魚市場咁，每日回收數以噸計發泡膠箱，而內地亦有專門回收發泡膠箱嘅廠房。反觀港府後知後覺，宣傳「藍廢紙，黃鋁罐，啡膠樽」幾十年如一日，仲要做到唔湯唔水，回收率輸其他地區九條街，如果唔係最近有民間團體自發到街市收膠，淨係旨意班坐喺冷氣房決策嘅官老爺，蚊都瞓蛇都死！港產官僚唔嗲唔吊，難怪香港地膠患咁嚴重，有環保團體推算，每年有多達一萬七千多億粒微膠珠直接排出大海，足足夠裝百幾架雙層巴士，魚食膠，人食「多膠魚」，日積月累，唔出事至奇！
所以話，唔使下下講到拯救地球咁神聖，環保其實好貼身，好簡單，周圍環境烏煙瘴氣，心情唔慌靚，長期情緒低落咯喎，分分鐘冇病變有病。呢，日前有團體公布各地快樂指數，香港喺人均天然資源需求以至碳排放量等得分幾乎墊底，甚至連敍利亞等第三世界國家都不如，都咪話唔閉翳。
始終都係嗰句，地球大家都有份，保護環境一定要兩條腿走路，淨係官熱民冷或者官冷民熱，始終都係唔掂嘅！