「低收入在職家庭津貼」（低津）五月起接受申請，但勞工及福利局局長張建宗尋日公布過去三個月來申請個案僅約三萬宗，涉及只約四萬人，同預計嘅七十萬人受惠相距遙遠。有團體批評有關津貼申請手續繁複，除咗要提供入息及資產證明外，仲要提供出世紙，而且離港限制太苛刻，令唔少申請人不勝其煩寧願放棄。其實低津原意係好事，但當局喺申請手續設立太多關卡，等於拒人於門外，結果好心做壞事，應該接納議員嘅建議，簡化申請程序，加派人手落區為居民填表，讓更多基層市民受惠。
