政情：傘兵搶人 自己友都冇面畀 青政黎耀駿退黨
成立年幾嘅青年新政（青政）又有人退黨！繼前發言人周世傑及「黃埔孖妹」之一的九龍城區議員鄺葆賢宣布退出之後，曾經代表青政參選油尖旺區議會嘅黎耀駿亦都靜悄悄退黨，更加盟同屬傘兵組織嘅東九龍社區關注組（關注組）。青政接連出現退黨潮，會唔會係因為同本土民主前線行得太埋，不得民心有關呢？
對於被指因為路線不同而退出青政，黎耀駿就極力否認，佢指去年辭職參選，之後因為重返職場而退出青政，改以義工身份幫手，強調與青政之間沒有不和，係和平分手。佢又指，因為見到關注組義工比較少，所以過去幫手。黎耀駿更喺社交網站透露，佢未來兩星期都會喺關注組嘅臨時大本營留宿，實行「瞓身」支持。
轉投東九龍社區關注組
對於有傳係關注組向青政挖角，關注組就矢口否認。不過，言猶在耳，又有人爆料指退出青政嘅鄺葆賢已經同關注組結盟，主要負責組織內嘅醫療政策，仲有以義工身份一齊出席選舉論壇添；此外，原來游蕙禎前助理亦已經過檔。雖然無人承認挖角，但似乎一場人才爭奪戰已經悄悄在本土派內展開。