政情：中學生模擬立會 「建制派」叮走Greg蘇
政府早已宣布將《二○一四年版權（修訂）條例草案》（版權條例）作罷，而立法會亦要到十月先復會，但尋日竟然通過咗與版權條例有關嘅議員動議，更有「建制派議員」坦言商務及經濟局局長於下屆政府或會被換走，唔知局長蘇錦樑（Greg蘇）聽到會唔會嚇親呢？其實尋日有逾五十名由校長推薦嘅中學生參加模擬立法會辯論，分別扮演議員及官員，站喺所屬嘅黨派立場就版權條例發言。
扮演民主黨議員嘅學生認為立法會換屆在即，加上政府任期不足一年，目前不適宜倉卒處理具爭議議題。不過，有代表建制派嘅學生就話，商經局局長一職的確有機會喺今屆政府任期後被撤換，但立法會所有議題均具爭議，若以此為由將會令每項議案均被拖延。雖然呢位「議員」旨在為政府護航，但就唔覺意插咗Greg蘇一刀喇，更可能預言Greg蘇真的被叮走都未定。
