政情：廢鑊冇米剩 難為陳章明
人稱「廢鑊」嘅平等機會委員會（平機會）前主席周一嶽，在任期間「大花筒」、「洗腳唔抹腳」，不斷擴充平機會，尤其係唔理租金增加一倍，都要充大頭鬼繼續租用太古城寫字樓，結果搞到平機會好有可能三年內耗盡儲備，但廢鑊已執包袱拍拍屁股就離任，難為接手嘅新主席陳章明要收拾爛攤子。「巧婦難為無米炊」下，陳章明只好想辦法節流，除咗物色平租寫字樓外，最終希望平機會搬去政府物業。
慷納稅人之慨 後患無窮
平機會搬去太古城寫字樓已差不多十年，點知陳章明上任主席幾個月就要面對唔夠錢交租嘅窘境。根據平機會文件，辦事處嘅租金由○五年每平方呎二十二元，增加至一一年每呎四十二元至今，而明年七月完租約後將會增加到每呎四十五元。不過，依家政府資助額只有每呎二十二元，即平機會要自行動用儲備補貼每呎二十多元租金，印證始作俑者嘅廢鑊認真慷納稅人之慨，帶來嘅禍害後患無窮。
對於太古城寫字樓租金貴，陳章明坦言，佢一接手平機會見到盤數都覺得好驚訝！雖然佢夠厚道無評論及數臭廢鑊，但係講明「事前無人同我講過盤數係咁」，擺明暗批廢鑊無交帶，離任後就話之你，關人個關。
儲備僅夠用三年 要搬竇
陳章明計過條數，發現平機會下年會開始出現結構性財赤，政府撥款只夠用嚟交租及增加人手已經耗盡，長此下去，儲備只夠用多三年，好擔心會影響訴訟及支援服務嘅經費，佢希望政府可以再「放水」畀平機會。至於租用辦公室，佢目標係呎租三十多元，暫時仲未有心水地區。他又向政府表明，希望搬去政府物業，只要係市區，而且提供無障礙通道，方便任何人士前往就可以，政府總部亦唔介意喎。
廢鑊掌管平機會以來屢爆爭議，任內不單止大花筒豪租辦事處，而且肥上瘦下僭建職位及爆出無理解僱等醜聞，又提出檢討歧視條例，保障內地新移民及個人遊旅客等，惹來社會嘩然。到臨離職前，廢鑊又以平機會主席身份高調出席撐同志活動，搞到平機會被外界質疑立場偏頗，更連累接任嘅陳章明在此問題上兩面不是人，而現時又要解決租金財困，廢鑊認真累人累物！