中環出更：喝茶凍齡 余國春「爸爸」變「弟弟」
喝茶好處多多，由消脂、抗老化到防癌不一而足，難怪幾千年來品茶文化歷久不衰。裕華國貨同台灣經濟部聯手舉辦嘅《台灣茶生活展》早前舉行開幕式，裕華後人及台灣幫傾巢而出。平時唔多講嘢嘅裕華董事長余國春心情靚靚，自爆廿年前被誤認係弟弟余鵬春（PC）爸爸嘅瘀事。結果佢養精蓄銳，日日飲茶養生，終於成功「凍齡」，依家調番轉，雖然佢大過PC七歲，但有人以為佢係PC嘅細佬喎！
余國春話，佢日頭鍾意飲鐵觀音，夜晚飲普洱，飲咗茶之後個人都冇咁多火氣。卓妮問PC點解會搞到自己殘晒？PC笑笑口承認對飲茶冇研究，又講笑話係被哥哥「糟質」嘅。咁啱最近佢去咗一趟美加，喺賭城住咗幾日，沙漠氣候搞到佢流晒鼻血，到依家都仲有時差。余國春就話，PC個樣顯老係因為社會公職多、有承擔就真。
楊靜嘆經濟不景壓力大
余國春家姐余小春、太太余游素子及兒子余偉傑都有到場，余太嘅樣貌保養得仲好，睇嚟飲茶真係得。同場仲有台灣一眾駐港代表，包括新上任嘅遠東貿易服務中心主任倪伯嘉、台北貿易中心主任孫至誠及香港台灣工商協會主席劉大貝等人。
中華出入口商會常董兼青委主席楊靜（Sally）都去歎靚茶。最近經濟不景，做珠寶生意嘅Sally一樣忙到飛起，事關佢公司喺加拿大有翡翠礦，亦係唔少國際名牌珠寶首飾嘅批發商，難怪佢話壓力好大，要飲茶減吓壓喇！
卓妮