一班動物進行講笑話大賽，規定如果冇人笑就要被掟落海，貓、狗講完，哄堂大笑，唯獨豬粒聲唔出，點知輪到蛇出場，都未開聲豬已經笑到見牙唔見眼，原來佢啱啱「醒起」貓嘅笑話好好笑。你哋話嘞，港產官僚反應遲鈍，後知後覺，係咪成隻豬咁吖。
教育局局長吳克儉呢排動作頻頻，繼早前約見八大院校校長，商討如何遏止港獨浪潮，尋日又同家校會開會，強調港獨議題違反《基本法》，不容喺校園鼓吹，絕無商討餘地；而佢老闆亦煞有介事，話如果任由「港獨」喺校園蔓延，對青少年有害無益喎。
鬼唔知阿媽係女人咩！家陣嘅問題係，港獨思潮氾濫成災，早就有迹可尋，幾年前大學刊物刊登港獨文章，之後獨派氣燄愈來愈囂張，直至近日港獨組織更擺明車馬，話未來會進入中學「播毒」添，官老爺一直如在夢中，到依家至識畀反應，仲有冇再遲啲呀。
港獨思潮入侵校園，已經擺在眼前，依家就睇港府點樣應對。教育局聲稱，教師喺校內鼓吹港獨思想，有可能被取消註冊資格，之但係你有張良計，佢有過牆梯，有教師組織質疑當局對「鼓吹」等字眼界定唔清晰，仲講到明「探討」唔等於「宣揚」，唔使問阿貴，獨派分子肯定會鑽盡空子打擦邊球，到時官老爺又有咩符？
講嚟講去，香港搞成今日咁，校園愈來愈烏煙瘴氣，都係教育出咗問題。回歸後中史被取消必修科地位，加上國民教育被大肆抹黑阻撓，最終拉倒收場，好多未經歷過港英時代嘅後生仔唔了解歷史，迷信殖民地月亮特別圓，以致產生好多美麗嘅誤會，以為殖民政府幾咁民主自由。好簡單，佢哋試吓港英時代搞抗爭宣揚港獨，莫講話上街掟磚頭，好似前高官咁喺學校派吓反殖單張，已經監都有得坐喇！
當然，蒼蠅不叮無縫的蛋，回歸後港府管治能力每況愈下，施政甩漏多多，特別係今屆政府，房屋、醫療、安老、教育冇瓣掂，年輕人上流無望，上樓亦無望，以前大學畢業就話「四仔主義」，屋仔、車仔、老婆仔、BB仔樣樣齊啫，最新調查發現，舊年大學畢業生起薪點比廿年前足足少咗一成四，加薪幅度亦遠遠追唔上樓價升幅，仲話四仔喎，四大皆空就有份。年輕人滿腔怨氣，再加上無良政客及傳媒唯恐天下不亂，起勢煽風點火，唔離心離德至奇！
有人話港獨即係「港毒」，再搞落去盞全香港人攬住一齊死，照咁講法，今屆政府被形容係「港獨最大推手」，「排毒」應該點做，畫公仔唔使畫出腸喇啩！