政情：張華峰令計劃扯上關係 皆因肥豬肉
全國政協原副主席兼中央統戰部原部長令計劃上月初被判無期徒刑，唔少人都同佢劃清界線，尋日有內媒引述消息，指原來令計劃同香港立法會金融服務界議員張華峰（肥老闆）竟然扯上關係。吓！涉及乜嘢事呢？咪就係肥佬闆食咗令計劃一舊肥豬肉囉！
張一句想食 令即叫烹煮
話說有消息傳出，喺一三年九月香港友好協進會訪問團抵京時，時任統戰部部長嘅令計劃唔單止改變行程，親自宴請逾三十名訪京團員，席間，身兼全國政協委員嘅肥老闆隨口講咗句「想吃肥豬肉」，令計劃聽見之後，二話不說即時請廚師為每人烹製一盅東坡肉。宴後，令計劃仲同賓客逐一握手、細語、擁抱，告別過程用足十五分鐘添！
肥老闆隨口噏句就即刻有得食，應該好和味喇，唔知佢有冇當面多謝令計劃嘅體貼安排呢？依家諗番起呢盅東坡肉，唔知會唔會猶有餘悸呢？再講，點解肥老闆當時突然想食肥豬肉呢？唔難理解嘅，佢向來為食又擦得，突然想食油膩嘢一啲都唔出奇嘅！張華峰參選九月立法會，其他金融服務界候選人還包括徐聯安及詹劍崙。