中環出更：帶學生實習 青聯前輩學埋一份
三人行，必有我師，暑假除咗係一眾學生實習累積實戰經驗嘅好時機外，仲係一班帶團前輩學習新事物嘅大好機會。香港青聯學生交流網絡早前舉辦「共創系列」暑期實習計劃總結分享會，香港青年聯會一班前輩都有出席支持，其中主席吳傑莊就難忘學習古代紙扇製作技術；而常務副秘書長何迪夫就話此行學識咗唔少潮語，成個人年輕晒。
何迪夫與副秘書長李芳宸（Franny）話，有次同實習學生一齊睇網上潮文，發現完全睇唔明，原來因為內文用咗好多潮語，喺班實習生講解下，依家就明白咩係「小鮮肉」及「暗黑系暖男」。何迪夫仲因為黝黑膚色，「探班」時又特地由香港購買零食畀班學生，所以獲得「印度暖男」稱號，覺得好新奇。
李芳宸讚團員自理能力增
至於Franny就話今次實習團見證學生自理能力提升，仲識得透過觀察，快速吸收及融入當地文化。好似有次佢探班時問學生半夜冇嘢食點算，啲學生就即場幫佢裝咗好多個方便佢喺北京叫外賣嘅手機App，而且仲幫佢裝埋隨時叫車嘅App，所以話有時學生吸收新事物同適應嘅速度真係好快。
今年青聯有超過二百個實習生分別於北京、上海及哈爾濱多個大型機構實習，吳傑莊話有學生有機會學習到古代嘅紙扇製作技術，仲話希望將來繼續研究更多相關知識。
常務副主席郭永亮就話，除咗文博機構如中國國家博物館、宋慶齡故居及故宮博物院相當吸引學生外，仲有重工業相關機器嘅實習機會，亦有學生於上海有機會落手籌備有關香港嘅展覽，相當難得。
卓妮