綠色先鋒：衣衣不捨
成人衣服變身童裝？二手衫都有Take Two？年過六十的May姐，曾在灣仔經營手造婚紗飾物樓梯檔，隨着利東街消失，May姐憑一雙巧手，加上累積多年手作經驗，孭起背包和工具箱，四處以流動樓梯檔形式，教授他人將廢物轉化成環保物件，用行動去改變社會對廢物的看法。May姐將首次舉行升級再造兒童時裝表演，利用五套成人衣服，打造成九套二手童裝，將綠色生活感染大人細路。
「以有限嘅資源製造出無限嘅想像同設計。」May姐以往在利東街經營樓梯檔，以手製婚紗飾物為不少新娘留下美好回憶，但退休後的她，有感港人物質豐裕，不少資源均用完即棄，「做手作嘅人隻手不願停，之後喺網上睇到好多製作環保手工嘅短片，令我構思到可以把廢物循環再造，用我嘅手藝去教識其他人認識環保。」
五套成人衫變九套童裝
「零廢生活」興起，提倡從生活細節開始減廢，惟May姐坦言港人環保意識薄弱，「要做啲吸引人嘅嘢，先可以令到別人注意到環保。如果只係單單叫人唔好丟垃圾，未必會令人明白到係乜嘢一回事。」她舉例，用水樽製作禮物盒，材料隨手可得，製作亦方便，讓參與者可感受到新奇好玩，加深了解輕鬆減廢的方式。
近日May姐搞搞新意思，把五套成人衣服，打造成九套二手童裝，「一件成人連身裙，可再造一件小童連身裙同一條裙仔，部分衫係我自己捐出嚟，有啲已經唔啱着，但丟咗佢又唔捨得。」她指，改造二手衫經多次嘗試，裁剪、修補，第一套童裝花上四小時製作，第二套用了兩小時。
教孩子環保由生活做起
「一套大人衫做番一套新嘅童裝，就已經係環保，已經令物件有Take Two。」May姐指，家長亦可試做二手童裝，既有吸引性，亦可親子互動，「時裝展嘅配飾都係用環保物品，如將報紙做花，畀啲小朋友拎住行Catwalk，從中教曉佢哋環保可以由生活做起。」升級再造時裝表演將在香港故事館及藍屋空地展出，「今次嘅時裝展係我人生嘅第一次，更加係一個好機會令我親自了解小朋友對環保嘅睇法，喺環保手工上做得更好。」
圖：吳啟偉、受訪者提供
文：周詠欣