政情：黃傑龍樂吃囡囡食剩
政府大力推動惜食運動，叫大家善用餘廚，唔好做大嘥鬼，唔少政商界名人都積極響應，其中一個就係叙福樓集團執董黃傑龍（Simon），可能有其父必有其女，Simon嘅囡囡都唔嘥嘢，留廚餘招呼爸爸。
Simon前晚喺社交網站facebook上載咗一張相，係一隻黑色大碟盛載一舊好細嘅肉。乜嘢嚟？原來係舊三文魚。Simon貼文話，由於工作繁忙應酬又多，唔係經常可以返屋企食飯，咁啱嗰晚佢可以早些少返屋企，但家人已食飯食到一半。咁佢見到囡囡嘅三文魚食剩少少，唔想浪費，所以佢問囡囡：「你食剩啲三文魚係唔係乾淨o架？」
「最美味愛心佳餚」
未等囡囡回答，Simon就準備一啖食咗，諗住唔好嘥，點知囡囡就開懷咁話：「留番畀你o架。」聽到囡囡咁講，Simon就以「一句說話，一件『廚餘』變成最好味的愛心佳餚」嚟形容當時嘅心情，明顯佢食廚餘都食得好窩心囉！