政情：蘇紹聰組隊毅行十年
律師除咗打官司外，公餘亦有好多興趣，有人更會選擇挑戰自己，其中新任律師會會長蘇紹聰（Thomas）就係行山常客。Thomas早於九十年代就熱愛行山，十年前仲發起律師會會員組隊，挑戰四十八小時內行一百公里麥理浩徑嘅年度行山大賽毅行者。佢話，九十年代已行毅行者，當年仲係由駐港英軍啹喀兵負責添！
行山訓練團隊精神
Thomas認為，一齊行山可以訓練團隊精神，所以十年前就發起，同三名會員一齊組隊參加毅行者，當時只係得一隊，點知行行吓，其他會員愈來愈感興趣，於是開枝散葉，一變二，二變四，律師會去年更組織一隊全女班，四名隊員都可以行晒全程，雖然需時四十四小時，但已經好難得。
講起組隊，好多人都試過行行吓山頂唔順隊友，顯露真性情。Thomas就話，好好彩自己冇呢個情況，因為隊友都有同一目標，並非要追趕時間，所以佢哋由最快廿四小時，到去年行廿七小時都試過，亦有年輕隊友行得較快，但雙方冇因為步伐唔同而有拗撬，最多喺檢查站休息半個鐘，等埋隊友再出發。
