政情：今日你上鏡：余黎青萍籲勿對廉署失信心

早前因為李寶蘭被取消署任廉政公署執行處處長而辭職惹起爭議，更引發廉署內部「地震」，尋日喺一個教育活動上遇到廉署首任社區關係處處長余黎青萍，當然捉住佢問呢單嘢啦！余太話，廉署嘅使命係肅貪倡廉，亦係香港賴以成功嘅基石，唔應該因為個別事件去質疑廉署崇高嘅理念。被問及外界對廉署連串嘅風波有好多揣測，難免會令市民對廉署失去信心時，余太就話廉署成立咗幾十年，得以成功係靠廉署上下一心一齊努力，而唔係個人做得到，所以唔好因個別事件而對廉署嘅信心有所動搖喎！