政情：教協明撐校園播獨
港獨問題愈演愈烈，香港民族黨召集人陳浩天早前舉行集會時聲稱，要全力支持港獨思想進入校園，又話撐港獨派支持者參選學生會，言論一出引起各界嘩然。對於有本土派學生要喺校園「播獨」，教協副會長張銳輝竟然話學校唔可以設立思考及討論禁區，認為唔可以排拒學生表達對社會嘅睇法，與早前立法會教育界議員葉建源撐學生有支持港獨嘅自由如出一轍。其實學生年紀尚小，作為教師竟然任由違法港獨思想喺校園散播，認真教壞學生！
張銳輝尋日出席電台節目時回應港獨分子入侵校園情況。佢指港獨其實係年輕人對現況不滿嘅一種表達方式，作為老師要給予渠道學生表達，更希望校園可以成為表達嘅場所，如果校園排拒學生表達對社會嘅睇法，對社會無好處喎。張銳輝都承認港獨係違反《基本法》，但佢覺得要了解學生講港獨嘅背後原因，又覺得唔可以設立學生思考和討論上嘅禁區，反問係咪「講都唔可以呢」？
應避免校園淨土受干預
不過，出席同一節目嘅前教育統籌委員會委員戴希立就有唔同睇法，佢認為，香港自古以來係中國一部分，如果推動港獨，就係分裂國土，係大是大非嘅事情，而唔單止係學術討論。佢覺得港獨問題可以討論，但要尊重歷史和《基本法》框架，而教師個人立場唔應該影響教學時嘅分析，亦要小心避免以自己嘅立場引導學生，更加要避免學生參與違法嘅行為。佢又話，有校外組織入侵校園，就會令學習嘅淨土受干預，作為老師應該干預排除。
入世未深 學生易受影響
張銳輝之後反駁，指學生討論港獨或者同成年人睇一國兩制一樣，其實睇睇兩制有冇實踐。戴希立就覺得，討論要有正當性，如果因為學生反政府，就容許討論港獨，未必具正當性。講到尾，學校作為學生學習嘅地方，實在唔應該被政治污染，學生入世未深，容易受到外來影響，正如戴希立所言，難保唔會有教師將自己立場引導學生，因而令學生港獨思想愈踩愈深，後果難以估計。