本土民主前線（本民前）發言人梁天琦早前喺個人Facebook（fb）上載短片同圖片，聲稱被兩名自稱「阿爺嘅」男子跟蹤咗一個月，搞到佢覺得煩厭。自短片上載後，梁天琦曾表示有關短片同圖片被移除，之後佢就再次重新上載資料，但被fb禁止發言。不過，有關短片同圖片依家忽然復活，但佢嘅立法會選舉提名就冇得復活喇。
梁天琦前晚喺fb貼出圖片，指fb以「不符合規則」為由，移除有關被跟蹤嘅貼子。其後佢重新上載短片同圖片，卻再次遭受舉報，fb仲向佢發出通知，話佢嘅帳戶被「禁言」廿四小時。
同屬本民前嘅黃台仰前晚喺個人fb向大家交代梁天琦fb被禁言一事，有網民為表不滿，留言呼籲將有關資料留底，仲揚言「一人一post」、「刪一貼十」，將資料轉載至不同網站。尋晚梁天琦喺最初上載短片嘅貼子上留言，指貼子「復活咗」，亦有網民話有關貼子其實喺下午時分已經復活。唔止最初嘅貼子「被復活」，連帶前晚梁天琦重新上載嘅都「被復活」。不過，相信梁天琦最想復活嘅，係立法會選舉提名。
卓妮