中環出更：從小「教大」尊師重道
剛升格大學無耐嘅香港教育大學（教大），話咁快已經搵到「水源」，卓妮尋日喺教大一個大樓命名典禮上見到校長張仁良與法國籍太太Christine笑得非常開心，事關張仁良話今次係佢哋正名為教大之後最大嘅一筆捐款。身在大學地方，大家都不期然講吓教育，包括點樣教導子女、遇過嘅啟蒙老師等，而張仁良就透露將教仔重任交由太太負責。
教大尋日舉行曹貴子基金會大樓命名典禮，出席嘉賓眾多，包括「玩具大王」蔡志明、曹貴子於仁愛堂董事局嘅一班成員老友、教大校董會主席彭耀佳及司庫趙麗娟等。有兩女一子嘅曹貴子話，佢最重視子女嘅德育，一定要尊師重道，而子女成長時往往係要「畀人教」，老師影響深遠，所以希望於教育方面出一分力。
趙麗娟感激恩師教誠實
趙麗娟亦認同老師質素好重要，佢話中小學階段遇過唔少啟蒙老師，好似小學時有個德育老師問同學點為之「誠實」，當大家都以為「唔講大話」就係誠實時，老師就同佢哋講，如果喺一間完全冇人嘅房入面，做咩都冇人知嘅情況下，依然堅持唔做壞事先係誠實，令佢一直銘記至今，出來工作後依然好受用。
而Christine就話，香港學生比法國學生競爭激烈好多，所以佢好鼓勵囝囝細個時玩多啲，平衡學習同生活，而佢亦冇干預囝囝揀讀咩科目同行業，自由發揮所長，依家二十六歲嘅囝囝就正於德國從事金融工作。Christine又透露，張仁良係個浪漫嘅人，當年喺巴黎每星期帶佢飲茶，又親自下廚煮中菜畀佢食，唔知有冇將呢啲追女招數傳授畀囝囝呢？
卓妮