港產官僚開口埋口「大市場，小政府」，講就好聽，其實只不過係少做少錯，不做不錯嘅代名詞，投資者信佢一成，雙目失明，分分鐘雞毛鴨血！香港數碼廣播有限公司（dbc）就係人辦嘞。
啟播近四年嘅dbc日前突然宣布向政府交還牌照，原來三間商營數碼聲音廣播機構家陣只剩低一間，都咪話唔閉翳。無錯，今時今日傳媒業競爭激烈，經營困難，但如果唔係港府鼠目寸光，毫無章法，dbc都未必使被迫執笠。係人都知，數碼聲音廣播唔係咩新鮮玩意，早喺上世紀八十年代已經出現，千禧年後更喺全球遍地開花，唯獨港產官僚後知後覺，拖到一一年至批出牌照畀三間公司，乜嘢先機都失晒喇！
反應慢九拍都算嘞，最離譜係港府批出牌照後拍拍籮柚，關人個關。揸車人士必須安裝專用收音機至可以收聽節目，點知當局冇修改相關法例，私家車、的士及輕型貨車安裝配備視像顯示器嘅數碼廣播收音機會被檢控，咁搞法搵鬼聽咩。你知喇，搵食車大佬係電台主要客戶，冇佢哋幫襯，廣告收入自然大受影響，投資者唔意興闌珊至奇。雖然港府舊年補鑊，宣布有關裝置獲法例豁免，可惜為時已晚，另一間數碼廣播電台隨即宣布交還牌照。
咁都未算吖，港府發牌至今大大話話已經五年，竟然仲有部分地區未能接收數碼聲音信號。喂，家陣搞網上節目門檻極低，甚至隨時可以喺社交網站進行直播，反觀數碼聲音廣播仲係咁唔方便，點同人爭吖。有學者就講得啱嘞，港府既無政策支持，又唔收番啲模擬牌，現有經營者仲點會投資，咁嘅牌出嚟做乜？
諗落都幾諷刺，數碼聲音廣播喺外國搞得有聲有色，點知喺香港就愈做愈縮，家陣提起數碼聲音廣播，大家淨係諗起前特首曾蔭權爵士嘅醜聞，呢啲咪叫橘越淮而枳囉。
家陣最大嘅問題係，隨着dbc關門大吉，超過一百名傳媒從業員加入失業大軍，前路茫茫，市民少咗選擇，亦係一種損失。仲有吖，港府搞數碼聲音廣播搞到一鑊粥，投資者見過鬼都怕黑，斷估唔會再有人接手經營，亦即係話，之前興建嘅基礎設施將會丟空餵蚊，公帑又係倒落鹹水海。造成今日嘅三輸局面，無神經無知覺政府絕對難辭其咎！
之不過咁，傳媒業進入寒冬，摺吓一間摺吓又一間，最大嘅「贏家」非港府莫屬，梗係喇，唔使日夜提防畀人揭發施政爛帳、高官醜聞，從此耳根清淨，天下太平，做衰嘢都安心啲。唔怪得有人話，港府係謀殺傳媒嘅最大兇手喇！