中環出更：股市小回春 少咗人鬧積金局
最近包括香港在內嘅全球主要股市表現都幾好，好多股民荷包又脹番唔少。尋日卓妮喺一個頒獎禮上見到強積金管理局主席黃友嘉，佢講到股市小回春都笑晒，原因唔係佢投資有斬獲，而係市民嘅強積金帳戶進帳咗唔少，所以鬧積金局嘅聲音都少咗喎！
由互聯網專業協會及香港互聯網金融協會等機構合辦嘅首屆「互聯網金融大獎」尋日舉行頒獎禮，黃友嘉做評判團主席，有份做評判嘅仲有香港會計師公會前會長趙麗娟（Susanna）及順豐集團財務部兼併整合處負責人劉業民。講起有不法之徒利用速遞公司進行電話詐騙，卓妮都趁機問吓劉業民，有咩辦法對付啲不法之徒呢？劉業民就笑笑口話，關於公司嘢佢唔可以代答喎！
趙麗娟未雨綢繆防假會計師行
講起詐騙案，最近警方破獲不良中介公司以假律師行進行非法騙貸，預計犯罪集團下一步可能扮埋假會計師行，以取得受害人信任。Susanna就話，早幾年公會已預咗會有假會計師行出現，所以都討論過點樣防範。佢畀貼士大家，所有要簽審計報告嘅會計師行，都必須要加入會計師公會，市民可向公會查詢即知真假。
互聯網專業協會會長洪為民（Witman）、副會長黃麗芳、香港互聯網金融協會聯席主席李國樑都有到場。Witman話，香港嘅互聯網金融已落後其他國家，若再不急起直追，恐怕將錯失發展良機，希望藉着頒發此獎項去發掘出色嘅互聯網金融機構，推動金融機構嘅科技創新及嘉許優秀金融技術先驅。
卓妮