古人話︰一封家書抵萬金，事關舊時冇飛機輪船鐵路汽車，寄信唔係話咁易。勢估唔到，今時今日香港地交通四通八達，寄封信都分分鐘要山長水遠甚至請半日假，你話係咪荒謬吖！
話說有位喺灣仔返工嘅市民，最近郵遞駕駛執照申請表格，點知因為冇留意郵費加咗價，貼少一毫子郵票，後來收到郵局通知，要求佢親自前往大角咀郵局補番欠資同附加費合共三毫子。就因為呢區區三毫，搞到要星期六專登請半日假由灣仔撲去大角咀跟進，簡直費時失事。
咪以為個別例子吖。有市民試過投寄三份報稅表，又係因為欠一蚊郵費要去郵局補寄，畀多五個六郵費事小，左騰右騰唔見粒幾鐘嗰度麻煩吖嘛。今年頭五個月，香港郵政處理約三十七萬五千件郵資不足嘅郵件，徵收罰款達一百一十萬元，有幾多市民因補交差額而被迫請假兼長途跋涉，可想而知。
即係咁，確保郵資足夠係投寄者責任，要求補足費用無可厚非，之但係郵政官僚可唔可以與時俱進，唔好咁擾民呢？家陣科技進步，容許市民到就近郵局或便利店付款易過借火，或者喺郵政系統加設電子繳費服務都可以方便市民，點解咁小嘅事都做唔到？
講真，一個幾毫郵票，唔通市民呃你咩，之所以貼唔足，都係因為當局宣傳不足，莫講話市民唔知郵費加價，政府部門有時都一頭霧水。呢，房署就試過發出「入伙通知書」，因為郵資不足而延誤派遞，爭啲耽誤申請人上樓。再講吖，市民好日唔寄封信，揦起手都唔知邊度搵郵票。去便利店買咩，一次過要買一pack，用完一張轉頭整唔見又係盞搞；去郵局逐張買咩，香港郵政近年緊縮開支，郵局摺得就摺，搵間郵局仲難過捉小精靈。不可不知，依家市民寄信多數寄畀政府部門，包括報稅以及交告票等，萬一因為郵資不足而延誤，後果可大可小㗎。
話時話，郵資不足問題一直存在，郵政官僚闊佬懶理，關人個關，直至舊年遭審計署炮轟至急急補鑊，揸正嚟做，可惜制度僵化，官僚擾民，結果添煩添亂。當然喇，香港郵政不務正業，亂追欠資搵市民嚟搞只係冰山一角，管理不善連年虧損、「失信於民」無日無之、員工集體蛇王兼呃超時補水……直頭係沒有最醜，只有更醜！
正所謂，一節見則百節知，香港郵政烏煙瘴氣，亂象叢生，正正係港府施政混亂，胡混度日嘅縮影。連一個小小衙門都管唔掂，港府仲話「適度有為」喎，盞笑大人個口嘅咋！