探射燈：中秋吹淡風 市道很難捱

市民唔捨得花幾千蚊食飯

吃團圓飯是每年中秋的指定動作，但今年經濟低迷，酒樓首當其衝。「往年同樣時間，已經接到唔少中秋節訂枱電話，部分客人會訂定長腳蟹及澳洲大鮑魚等貴價海鮮，但今年仲係『食白果』，一張訂單都未有。」西貢區飲食業協會主席邱全對今年中秋節市道看淡，估計慘淡程度直逼○三年的沙士，預期生意額較去年減少兩成。

「以前六至八人食團圓飯，閒閒哋會花費千多蚊，依家會選擇啲唔夠一千蚊嘅套餐，好多食肆希望薄利多銷，中秋節當晚唔好有空枱。」香港餐飲聯業協會會長黃家和指出，「經濟放緩，依家好多客人已經唔捨得花費幾千蚊食飯，今年消費力弱咗好多。」

鄧先生預期今年中秋果籃生意較去年遜色。	專售中秋節玩樂用品的商戶指今年銷情吹淡風。	邱全表示，過往有顧客一早預訂貴價海鮮過節，但今年未見。

客戶手頭緊 果籃變「的骰」

中秋節除團圓飯外，不少公司也會向客戶送贈中秋果籃。但多個行業受經濟差影響，送贈客戶的中秋果籃也變得「的骰」。「往年有顧客試過花一萬蚊豪砌果籃。」油麻地一間水果店店東羅先生表示，現時顧客荷包縮水，公司接獲的果籃預訂，每個的金額也大幅減少，由一千元減至五百元，估計中秋生意額會下跌一成。

鄧小姐表示，螢光棒入貨量將由去年的一百五十箱，減少至一百箱。	巫伯雄指出，本港經濟市況持續向下。	市民點睇 陳小姐（文員）：「今年市道唔太好，所以平時會慳啲使，等過節嗰時先食好啲。」

另一水果店店東鄧先生更嘆道，「以一個三百蚊果籃為例，我哋只賺得五十蚊左右，比起好景時賺少咗兩成。啲客要講價，如果唔係太過分，我哋都會應承，寧願賺少啲，都唔想到時啲生果放喺度爛，血本無歸。」

而在中秋節晚上玩樂必備的燈籠及螢光棒，今年銷情同樣吹淡風。深水埗福榮街一間零售檔主鄧小姐指出，過往只在中秋前一、兩周，才將中秋玩樂用品「擺出嚟」，但今年經濟差，提早於一個月前，已開始售賣相關產品，希望可以賣多些。

經濟轉差 影響消費意欲

「以前中秋嗰一個星期，賺一、兩萬蚊唔係難事，但今年經濟差，擔心客人因舊燈籠仲未爛而唔買。所以，依家唔敢大手入貨，只會逐少逐少加單，擔心到時賣唔去。」她又指入貨量會較去年減少，例如螢光棒，由去年的一百五十箱，減少至一百箱，「我入咗啲DIY燈籠，希望可以吸引小朋友同大人，唔好蝕本收場。」

香港浸會大學經濟系副教授巫伯雄指出，本港經濟市況持續向下，將直接影響市民於節日的消費能力，加上中秋氣氛薄弱，估計售賣中秋節產品的商戶，於今個中秋節會陷入「捱打期」。

圖/文：專案組