政情：梁天琦稱被跟蹤 車中男：「阿爺嘅」
因主張港獨被裁定立法會新界東候選人提名無效的本土民主前線梁天琦，前日喺社交網站Facebook（fb）上載一段短片，指稱一架黑色私家車跟蹤佢整整一個月，令佢非常煩厭。影片中梁天琦同黃台仰走到尾隨嘅私家車並打開車門，連番爆粗質問車上兩名男子係乜嘢人同點解要跟蹤佢？喺再三質問下，車內一名男子回應稱「阿爺嘅」、「報紙嘅」，又表明「我唔想知你哋做乜嘢，係有人想知。」
爆粗質問兩男子身份
影片中所見，梁天琦同黃台仰喺拉開私家車車門後，隨即爆粗多番質問車上兩名男子：「邊×度o架你？」兩名男子回應：「唔使講粗口，開門好冇禮貌。」但黃冇理會，繼續爆粗質問佢哋喺邊度派嚟嘅？車上男子又說：「答得，你斯文啲，唔使拉開門，我冇騷擾你喎，係咪先」，梁則反駁指：「你又好斯文咩，你冇×騷擾過我？」對方答：「冇騷擾。」
喺佢哋再三質問下，對方回應：「你都知我係邊度o架喇，阿爺嘅。」再追問邊個部門呀？對方稱「報紙呀」，跟住就話只可以講咁多嘞！之後對方又話唔想知佢哋做乜嘢，「係有人想知」。
同時間，梁天琦亦喺fb展示嗰架私家車嘅登記資料，據聞係出租車，網民亦紛紛留言叫佢注意人生安全：「盡可能出入都高調啲，咁冇咁容易畀人捉去強國」、「專登租車咁大手筆，擺明有心跟你，等你起唔到佢底。」