政情:工聯會議會新丁 未上任先施壓

工聯會陸頌雄及何啟明在立法會勞工界功能界別自動當選,尋日以候任立法會議員身份會見傳媒,提早向港府主責勞工福利議題嘅官員表明態度底線,指佢哋於爭取勞工權益時會硬淨啲,如政府拖延必會表達出打工仔嘅憤怒,舉例指於標準工時問題,陸頌雄表明唔可以再停留諮詢階段,合約工時嘅方案更加唔收貨,因為此舉有機會令無償加班合法化,變相令打工仔更蝕底。

稱會強硬爭取勞工利益

至於強積金對沖機制問題,陸頌雄亦指當局於呢個議題冇任何含糊空間,因為特首梁振英嘅競選政綱白紙黑字寫明會處理,佢再三強調,有需要時會展示各方面嘅壓力,力追政府交出滿意方案喎。

當問及倘若當局於勞工議題上交唔出滿意答覆,會否加入拉布嘅行列,何啟明稱拉布並非唯一解決方法,亦可透過唔同渠道跟進,不過由始至終,佢哋冇承諾一定唔拉布,唔通係想留為爭取勞工權益嘅最後一着?

第一手消息請下載on.cc東網iPhone/iPad/Android/Windows Phone Apps