政情：路政一鑊泡 劉下爛攤子

高鐵工程喺二○一三年出現延誤同超支問題，當時政府「改姓賴」，將問題「賴」落天氣同埋地質問題上。不過「人在做，天在看」，後來翻查內幕文件，愈揭愈醜，先發現原來政府監察不足，導致問題產生。立法會曾經就此成立專責委員會召開研訊，劉家強當時除咗道歉，仲聲稱路政署一直有督促港鐵追回進度。由於工程一拖再拖，造價飆升至逾八百四十四億元，政府除為超支封頂外，仲要向立法會追加逾一百九十五億元填氹，變相係市民埋單，高鐵預計喺一八年第三季通車。究竟劉家強係點「督促」嘅呢？

人工島飄移 揭亂改工序

政府聲稱因為考古問題，沙中線工程大受影響，要延期接近一年，超支起碼成四十億元，至今都仲未講實可以幾時通到車。港珠澳大橋就仲誇張，除咗同樣出現超支同延誤外，仲要爆出人工島「飄移」。「飄移島」事件被爆出後，劉家強一開始咬定屬尋常現象，後來先被揭發涉違規更改填海工序，令路政署誠信破產。

黎文軒下周退任消防處長

呢啲工程預計喺未來兩、三年完工，都唔知仲有乜嘢變數，劉家強依家退休當然甩難喇，難為新任署長鍾錦華去執爛攤子啫！之不過，鍾錦華今年都五十有七，話唔埋做多一兩年就嗌退休，到時啲工程都唔知完工未？

除咗劉家強退休外，消防處處長黎文軒喺下星期一開始退休前休假，處長一職將會由現任副處長李建日接替。