中環出更：暑假揮汗 學生體驗基層生活
喺日前舉行嘅「海外學生仁濟夜慈善餐舞會」，一班仲讀緊書嘅年輕人利用暑假揮灑汗水，當晚交出一張近二百萬元嘅大支票，喺經濟唔好嘅情況之下，成績已算唔錯。籌委會主席兼仁濟副主席黃美斯話，海外學生仁濟夜已踏入第廿四周年，來自各地嘅留學生藉此參與同了解基層嘅生活，明白幸福非必然嘅道理，多年來已成功培育唔少社會棟樑同慈善家，薪火相傳，好有意義。
卡撒天嬌集團創辦人兼仁濟總理鄭斯堅（Leo）嘅兒子鄭嘉駿及女兒鄭嘉琪、總理蔡高燕姬嘅兒子蔡承希（David）都係今年嘅學生成員。Leo話一對仔女都喺英國讀緊大學，希望佢哋透過呢個活動見識吓，亦可識多啲朋友。其中鄭嘉琪修讀平面設計，咁以後咪可以幫手設計床單、枕頭套？Leo笑笑口話日後由得仔女按自己興趣發展，唔會強求佢哋返公司幫手。
何百里為善事揮毫
David平時經常跟住媽媽蔡高燕姬出席仁濟活動，所以大家對佢唔陌生。佢話雖然已經讀完書，但係參加今次活動好有得着，可以認識香港唔同階層嘅需要。卓妮見佢講嘢咁大方得體，唔知係咪媽媽教導有方？蔡高燕姬就笑笑口話，David自細就好受姨媽、姑姐歡迎，探訪長者時都氹得老人家好開心，個個都好鍾意佢。不過唔係佢教嘅，可能係天生喎！同場仲有香港著名中國水墨畫家何百里夫婦，事關佢特登為今次活動揮毫「餘慶」橫額，認真有愛心。
卓妮