22歲大學生玩到頸僵壓神經
Jeremy是大學三年級生，趁放暑假幾乎每日由九龍家中過海搭「叮叮」，沿途捕捉小精靈，由堅尼地城坐到筲箕灣，每日來回坐兩至三個鐘，行路又玩、搭車又玩，一日可瘋狂玩五個鐘。結果上肢麻痹、頭痛及手指痛，求醫證實頸椎錯位壓到神經線所致。
廿二歲的Jeremy自言算玩得瘋狂，「遊戲未推出已經好期待，一出咗就同朋友幾乎日日玩，唔夠一個禮拜，就升到去lv17，捉咗六百幾隻精靈。」他最常搭電車捉精靈，「因為沿途好多Pokéstop，同朋友可以來回搭幾個鐘電車。」玩得投入，幾乎連頭都不抬一下，低頭成習慣。
上肢麻痹 拿筷子感疼痛
玩了一星期，他經常感頭痛，頸部無法自如伸展，更感上肢麻痹，「連手指都痛，食飯（拎筷子）要就住就住。」但他仍忍痛繼續玩，直至「唔郁都痛」才去求醫。
註冊脊醫及物理治療師何應輝表示，Jeremy因長期低頭，令椎間盤壓力增加，長出骨刺，壓迫頸椎第三至五節神經，影響上肢麻痹；頸椎已失去弧度，僵直得無法自主扭動。他正接受拉頸及超聲波治療，逐漸康復中。Jeremy現時不敢再日日玩，「雖然驚畀朋友大幅拋離，但為咗健康，惟有玩少啲。」
本報記者