奧運開幕，香港同中國代表隊一如以往分開入場，有外國網友居然擺烏龍，以為香港已經「獨立」。雖然只係笑話一則，但獨派氣燄囂張，卻係不爭事實。前幾日港獨組織吹雞，成功召集數千人集會，吸引國際媒體關注，連《時代雜誌》網站都大篇幅報道，有外國人誤會香港已經獨立有乜出奇吖！
即係咁，獨派組織抗議當局剝奪部分人參選立法會嘅資格，家陣一呼百應，證明港府愈反愈獨，弄巧反拙。當局引入確認書新安排，出發點唔係話唔啱，結果卻因為思慮不周加上標準不一搞到滿城風雨。溫和反對派一致拒簽，港府照樣放行，反而部分獨派參選人簽咗都被叮走。最離譜係當局又玩捉小放大，淨係敢向魚毛蝦蟹開刀，對班大佬就一味鬆章，結果咪授人以柄囉。正如「東方報業民意調查」顯示，大部分受訪者直斥當局臨急抱佛腳，章法大亂，盞添煩添亂嘅咋。
有學者就講得啱嘞，確認書原意係遏制港獨勢力，點知執行論論盡盡，畀人睇穿原來係「二仔底」。呢，話口未完，有簽署確認書且獲入閘嘅年輕本土派政客喺選舉論壇上大大聲話港獨係「順我者昌，逆我者亡」，擺明「確認當食生菜」，你話當局搞咁多嘢，係咪法國大餐──多舊魚吖！
事實擺在眼前，港獨分子簽署確認書，甚至口口聲聲「擁護《基本法》」，只不過係「戰術上退卻」嘅權宜之計，一旦成功入局，過咗海就係神仙，到時肯定故態復萌，當局點樣應對呢？
講真，確認書淪為一場鬧劇，更大嘅麻煩仲喺後頭。有人爆響口申請司法覆核，港府一旦敗訴，選舉結果分分鐘推倒重來，觸發嚴重憲制危機。咁都唔止，有被剝奪參選資格者要求英美介入禁選風波，亦有網民透過美國白宮網站發起聯署，要求美國佬施壓。上述民調顯示，唔少受訪者擔心選舉受外部勢力干預，隨時演變成國際事件，絕對唔係杞人憂天o架。
話時話，港獨思潮唔係今日至有，但氾濫成災都係近幾年嘅事。之所以搞成咁，港府施政無能，經濟民生每況愈下，固然難辭其咎，姑息養奸，養癰遺患先至係最大問題，特別係佔領之亂後，港府對幕後黑手投鼠忌器，違法零成本咯喎，乜嘢「勇武抗爭」、「民族獨立」、「香港歸英」等牛鬼蛇神仲唔爭住蒲頭咩！
始終都係嗰句︰禁微者易，救末者難。如果唔係港府掉以輕心在先，進退失據在後，港獨毒港就唔會一發不可收拾。今屆政府畀人話係「港獨最大推手」，依家知點解喇。