政情：周浩鼎肯跌肯撞 獨愛欖球
尋日係全民運動日，離島區議員周浩鼎（Holden）約埋幾個區議員一齊打乒乓波，Holden打波時顯得雞手鴨腳咁，仲有幾次打咗落網，睇嚟官仔骨骨嘅佢好似無乜運動細胞喎。Holden接受訪問時就反駁，話自己無打開乒乓波，所以會顯得比較生疏，仲自爆可以碰碰撞撞嘅欖球先係佢最愛。
Holden話喺英國讀書時一直有打欖球，雖然自己無外國人咁大隻，又唔算跑得好快，但因為肯跌肯撞，所以當時同學都好歡迎佢參與。佢話透過欖球可以訓練團隊精神，所以就算返咗香港，都曾經喺東涌成立地區欖球隊，同街坊練吓波。不過，佢慨嘆香港打欖球嘅場地不足，令運動難以發展。
奧運睇好新西蘭隊
講到今屆奧運有乜心水欖球隊，Holden就按個人經驗，估計冠軍應該係新西蘭嘅囊中物，至於其他項目，佢話對跳水最有興趣，都會抽時間支持吓跳水王者中國隊咁。