政情：女神唔垂青 劉頴匡無緣做「青兵」
傘後團體沙田社區網絡主席劉頴匡經常喺網上發表言論，佢尋日又喺社交網站facebook上自爆，退出新同盟之後打算加入青年新政，最後不了了之，形容自己係得唔到女神賞識，伍都入唔到的小兵。雖然劉頴匡講到青政排斥佢咁，不過有人留言叫佢幫手處理青政嘅宣傳單張時，佢又話新東傘兵要幫手，就唔係貼地址咁簡單，真係唔知佢點想喇？
青政成員欲擺和頭酒
劉頴匡尋日發文話，好多人誤會佢唔鍾意青年新政，或者以為雙方有牙齒印，但其實佢當年退出新同盟之後第一件事就係接觸青年新政想加入，可惜最後不了了之，質疑係青政唔鍾意佢，令佢唔可以幫手。佢又反問，既然人哋唔想佢幫手，唔通跪地求咩，仲將自己比喻成「得唔到女神賞識，伍都入唔到的小兵」添！
見到劉頴匡咁講，有青年新政成員就留言話約個日子打邊爐傾偈，而劉頴匡就以「等你」、「真係約得成先算」回應。睇嚟當中嘅恩恩怨怨唔係咁簡單，唔知呢場係鴻門宴抑或和頭酒？係咪可以解決兩家恩怨呢？