政情：梁偉光退休 搵到好「仁」家
香港人愈來愈長壽，就算五、六十歲退休，都仲可以有好多發展機會，最新嘅例子係正在退休前休假嘅入境處前助理處長（管理及支援）梁偉光（Jason），佢會於九月過檔至仁濟醫院董事局任行政總裁（CEO），接替任職約十五年、將於本月底退休嘅黃偉健，而事有巧合，Jason及黃偉健同樣與紀律部隊有淵源，前者於入境處退休前官至助理處長，後者出任仁濟CEO前係監警會前身嘅警監會秘書長，兩人同聲同氣似乎有共通語言，可望無縫交接。
唔少慈善團體及商會，近年都好鍾意請前高官或公營機構高層揸旗，相信係睇中佢哋嘅管理經驗以及人際網絡，還記得一年多前，運輸署前助理署長蘇祐安離開政府，過檔去慈善機構東華三院做執行總監，及至最近再有類似例子，黃偉健日前出席活動時透露，自己原定於五月退休，而因尋找接任人需時，延至本月底才退休，據知Jason同場亦以仁濟候任CEO身份現身，提早熟習新工作。
休養半年 九月上任
資料顯示，Jason於入境處工作好耐，曾任入境事務學院校長，退休前官至助理處長，更於○九年以超卓表現，獲頒授香港入境事務榮譽獎章。佢解釋，自己仲係退休前休假，為期長達七個月，加上屬首長級公務員，要向公務員事務局申請於「過冷河」期間工作。最近獲批後，已同仁濟簽約，最快於九月一日先可以接任，佢又笑稱自己真正做到無縫交接。當問及如何搵到呢份新工作，Jason話於報紙發現有招聘廣告，自己膽粗粗入紙申請及面試喎。
至於黃偉健退休後有乜新計劃，據聞仁濟已開設「首席參贊」職位，搵佢幫手跟進「大項目」，為期一年，但就冇詳細講「大項目」所指嘅內容，據知仁濟早前有意就食物及衞生局開設中醫院提交意向書，唔通呢個就係未對外披露嘅「大項目」？
近年高官頻跳槽
除咗Jason同蘇祐安離開政府加入慈善團體外，資料顯示，近年資深政務官紛紛離開官場「熱廚房」，早年落腳點首選係薪高糧準嘅公營機構，近年則於商會有較多足迹，如現任總商會總裁袁莎妮、去年八月底加入工總任總裁嘅何健華等，究竟呢個跳槽走勢會否因政治環境風向再有變化，時間將會證明一切。